Қазақстан 61-ші Венеция биенналесіне дайындалуда: кураторларға байқау жарияланды

Қазақстан Республикасының Мәдениет және ақпарат министрлігі 2026 жылы өтетін қазіргі заманғы өнердің 61-ші Венеция биенналесіне елдің Ұлттық павильонын дайындау үшін кураторларға ашық байқау жариялады.

Биеннале 2026 жылдың 9 мамыры мен 22 қарашасы аралығында өтеді. Байқаудың басты мақсаты — биенналенің «In Minor Keys» тақырыбына сай, тұжырымдамалық және көркемдік тұрғыдан біртұтас жобаны іріктеу және Қазақстанның заманауи өнерін халықаралық деңгейде таныту.

Конкурс кураторлық және зерттеу бастамаларын қолдауға, пәнаралық тәсілдерді дамытуға, сондай-ақ жергілікті қауымдастықтармен ынтымақтастықты кеңейтуге бағытталған.

Қатысуға кемінде бес жылдық кураторлық тәжірибесі бар Қазақстан азаматтары – жеке кураторлар мен кураторлық топтар шақырылады. Басымдық Қазақстанда тұратын және жұмыс істейтін мамандарға беріледі.

Қазақстанның Ұлттық павильоны Венецияның әйгілі «Музей милясы» бойында орналасады. Көрме кеңістігі шамамен 250 шаршы метрді қамтиды және арт-объектілерге арналған ішкі ауласы (Courtyard) бар.

Өтінімдер 2025 жылғы 9 желтоқсанға дейін қабылданады, ал нәтижелер 2026 жылғы 5 қаңтарда министрліктің ресми сайтында жарияланады.
Байқаудың толық шарттарымен Мәдениет және ақпарат министрлігінің ресми сайтындағы «Құжаттар» бөлімінде танысуға болады.

Өтінімдер info@kazakhstanpavilion.kz электронды поштасы арқылы қабылданады.