Қазақстандық психологиялық қолдау платформасы Стэнфорд акселераторына іріктелді: WeGlobal AI
Stanford University жанындағы StartX акселерациялық бағдарламасына қабылдану, Oxford University профессорымен бірлескен зерттеу жобасы — қазақстандық стартаптың жетістіктері. WeGlobal AI бүгінде елдің он үш өңіріндегі шамамен екі мың мектепте жұмыс істейді, платформада 1,2 миллионнан астам оқушы мен 16 мыңнан астам мектеп маманы тіркелген. Компания сыртқы инвестиция тартпай, өз есебінен дамып, табыстылыққа шыққан. Бұл EdTech саласында бұл сирек кездесетін траектория.
Осының бәрі үш жыл бұрын Астанадағы бір ғана мектептен басталған еді. Steppe WeGlobal AI жобасы жайлы.
Халықаралық танылу
WeGlobal AI-дың халықаралық деңгейдегі жолы бірнеше маңызды кезеңнен тұрады. Команда Stanford University жанындағы StartX акселерациялық бағдарламасына іріктеуден өтіп, қазір АҚШ-тағы мектептермен жұмыс істеу мүмкіндіктерін зерттеуде. Американдық нарыққа шығу үшін жергілікті пилоттар құру және өнімді бейімдеу қажет екенін команда жақсы түсінеді, сондықтан осы бағытта белсенді жұмыс жүргізілуде.
Ұлыбритания бағытында зерттеу серіктестігі дамуда – Oxford University-дің балалар мен жасөспірімдер психиатриясы профессоры Мина Фазелмен бірлесіп, Қазақстанның жиырма өңірінде он мыңнан астам оқушыны қамтитын ауқымды зерттеу дайындалуда. Қазір IREC этикалық комитетіне өтінім берілді, зерттеу командасына Назарбаев Университетінің үш профессоры, WeGlobal AI зерттеушісі мен компания психологтары кіреді. Зерттеу толығымен Назарбаев Университетінің ғылыми базасына сүйеніп жүргізіледі.
Команда бір маңызды нәрсені атап өтеді: халықаралық кеңею Қазақстаннан кету туралы емес. Стэнфордтың тәсілдемелері, Оксфордтың зерттеулері, американдық мектептік қолдау тәжірибесі — мұның бәрі ақыр аяғында қазақстандық мектептер пайдаланатын платформаға қайтып оралады.
«Сырттан алынған тәжірибе неғұрлым мол болса, отандық өнім соғұрлым күшті болады».
— WeGlobal AI командасы
Идея қалай пайда болды
Қазақстан мектептерінде психологтар, әлеуметтік педагогтар мен сынып жетекшілер үлкен жұмыс атқарады, бірақ процестердің көпшілігі әлі де қолмен жүргізіледі. Бір психолог бірнеше жүз оқушымен жұмыс істейді, уақыттың көп бөлігі қағазбастылыққа кетеді, ал балалармен тікелей жұмысқа уақыт жетпейді.
WeGlobal AI осы мәселені шешу үшін құрылды. Жасанды интеллект пен цифрлық құралдар арқылы мамандардың рутиналық жұмысын автоматтандырып, олардың уақытын балалармен жұмысқа бағыттау болды.
Команда бастапқыда профориентациялық платформа құруды жоспарлаған еді — жоғары сынып оқушыларына өз күшті жақтарын түсініп, болашақ мамандығын саналы таңдауға көмектесу. Алғашқы пилотты Астана мектептерінде 8-11 сынып оқушыларымен іске қосты. Алайда мектептермен жұмыс барысында басқа шындық ашылды. Директорлармен, психологтармен, әлеуметтік педагогтармен сөйлесу кезінде бір тақырып ерекше көзге түсті — балалар стрессі мен мазасыздығы, буллинг мәселелері. Көптеген мектеп үшін оқушылардың психологиялық әл-ауқаты мамандық таңдаудан да өзекті мәселе болып шықты.
Сол кезде команда бір қарапайым нәрсені түсінді: егер бала стресс сезінсе, қорқыныш пен мазасыздықта жүрсе, оған болашақ мамандығы туралы ойлау қиынға соғады. Сондықтан мамандық таңдау мен психологиялық көмекті бөлек қарауға болмайды. Екеуі бірге жұмыс істеуі керек. Осылайша WeGlobal AI тек мамандық таңдауға көмектесетін қосымшадан мектепте оқушыны толықтай қолдайтын платформаға айналды.
Платформа қалай жұмыс істейді
WeGlobal AI бірнеше деңгейлі жүйе ретінде құрылған, әрбір пайдаланушы өзіне қатысты ақпаратты ғана көреді. Оқушы мобильді қосымша арқылы платформаға кіреді – ішінде психологиялық диагностика, профориентациялық құралдар, білім беру бағыттары туралы ақпарат, емтиханға дайындық материалдары, сонымен қатар мамандық пен дағдылар туралы сұрақтарға жауап беретін ЖИ-тәлімгер бар. Егер балаға шұғыл көмек қажет болса, SOS арна арқылы маманға тікелей жүгіне алады.
Мектеп мамандарының әрқайсысының өз цифрлық кабинеті бар. Психолог диагностика жүргізеді, оқушылардың динамикасын бақылайды. Әлеуметтік педагогтар мен кәсіби бағдар берушілер платформаны күнделікті жұмыс құралы ретінде пайдаланады. Мектеп әкімшілігі басқару панелі арқылы жалпы суретті көреді, бірақ оқушылардың жеке психологиялық деректеріне қолжетімділігі жоқ — тек агрегатталған аналитика. Облыстық психологиялық қолдау орталықтары да платформа арқылы өз өңірі бойынша статистика мен талдауды көре алады.
Жасанды интеллект мұнда диагноз қоймайды және психологтың орнын баспайды — ол бұрын апталап қолмен жасалатын жұмысты автоматтандырады, мамандар уақытын балалармен тікелей жұмысқа бағыттай алады.
Бір мектептен екі мыңға дейінгі жол
Алғашқы пилот Астанадағы бір мектепте, содан кейін алты жеке мектепте өтті — дәл сол жерде команда мамандармен бірге отырып, кері байланыс жинап, өнімді қайта-қайта жетілдірді.
Жоба жолдың дамуы — 2024 жылғы Педагогтардың Тамыз конференциясы. Конференцияның басты тақырыбы «Digital Kazakhstan: заманауи білім беру» – технологияларды білім беруге енгізу мәселесіне арналған еді, бұл WeGlobal AI командасының жұмысына оң қарым-қатынас тудырды. Сөз сөйлегеннен кейін Түркістан облысының өкілдері хабарласты. Нәтижесінде облыстың 71 мектебінде бірден ірі пилоттық жоба іске қосылды. Негізін қалаушылар мен команда мүшелері мектептерге өздері барды — шалғай ауылдарға дейін, директорлармен, психологтармен жүзбе-жүз кездесіп, мектептердің шынайы жұмысын өз көзімен көрді.
Түркістандағы пилоттың табысты нәтижелері бүкіл ел бойынша өсудің іргетасын қалады, және жоба шағын пилоттардан республикалық деңгейдегі жүйеге бірнеше жыл бойы мектептермен тығыз жұмыс, тұрақты кері байланыс және өнімді кезең-кезеңімен жетілдіру арқылы өсті.
Сонымен қатар WeGlobal AI жергілікті психологиялық қолдау орталықтарымен бірлесіп PsyTalks кәсіби форумдарын ұйымдастырып, бас демеуші ретінде қатысып келеді. Форумдар Түркістан, Алматы, Тараз және Маңғыстау облыстарында өтіп, оларға елдің түкпір-түкпірінен 3000-нан астам психолог қатысты. PsyTalks алаңында суицидтің алдын алу, мектептегі психологиялық қауіпсіздік, эмоциялық тұрақтылық және ЖИ технологияларын қолдану мәселелері талқыланып, мамандар нақты тәжірибе мен қолданбалы шешімдермен бөліседі.
Компания сенімді бағдарламалық қамтамасыз ету тізіліміне енгізілген — бұл балалардың деректерімен жұмыс істеу аясында платформаның қауіпсіздік талаптарына сай екенін растайтын маңызды қадам.
Қазақстандықтардың 60%-ы мамандығы бойынша жұмыс істемейді
Бұл көптен белгілі статистика, бірақ WeGlobal AI командасы оны бір өніммен шешуге болады деп айтпайды:
«Мәселенің себептері тереңде. Жасөспірімдер ата-ана қысымы, мамандық беделі, грант мүмкіндігі сияқты сыртқы факторларға бағынады, ал еңбек нарығы тез өзгеріп жатыр. Алайда платформа таңдау процесінің өзін өзгерте алады».
WeGlobal AI баланың орнына мамандықты «табуды» мақсат етпейді — оқушыға өз қызығушылықтарын, күшті жақтарын, мотивациясын зерттеуге құралдар береді. Нәтижесінде мамандық таңдау он бірінші сыныптың соңындағы стресстік шешімнен мектеп, ата-ана мен мамандар бірлесіп қатысатын саналы процеске айналады.
Алдағы жоспарлар
2026 жылдың жазы команда үшін жаңа оқу жылына дайындық кезеңі. Оқушыларға арналған мобильді қосымшаның жаңартылған нұсқасы дайындалуда — кеңейтілген профориентация мүмкіндіктері, жақсартылған ұсыныстар жүйесі. Мамандар үшін жыл бойы жиналған кері байланыс негізінде интерфейс жақсартылуда, күнделікті жұмысты жеңілдететін қосымша құралдар енгізілмек. ЖИ мүмкіндіктері рутиналық процестерді автоматтандыру бағытында дамытылуда, ал жаңа аналитикалық құралдар мектептер мен өңірлерге ұлттық деңгейдегі үрдістерді бақылауға мүмкіндік береді.
«Үш жыл бұрын Астанадағы бір ғана мектепте пилот жүргізген команда бүгін елдің екі мың мектебінде күнделікті жұмыс істеп, Стэнфорд акселераторына іріктеліп, Оксфорд университетімен бірлескен зерттеу жоспарлап жатыр. Алда американдық мектептердегі пилоттар, жиырма өңірде он мың оқушыны қамтитын халықаралық зерттеу және — ең бастысы — елдегі әр баланың көңіл-күйі мен қажеттілігі назардан тыс қалмайтын мектеп жүйесін құру. Біз үшін бұл тек технология емес — бұл әр баланың маңызды екенін көрсететін жол».
